Parte Zaharreko
15 eragileren adierazpena:
Udalak Kijera Gaztetxea itxi eta
auzobizitzarako ekipamendurik gabe utzi gaituela salatzeko.
Auzo
Erantzuna.
Gure auzoan behar handiak ditugu
Alde Zaharrak
dituen behar eta gabeziak ez dira oraingoak. 2019ko otsailaren 23ko
adierazpenean hauxe esaten genuen:
Parte Zaharrak, pairatzen ari den bilakaera dela-eta (turistifikazio
masiboaren ondorioak, auzotarren alde egitea eta biztanleen galera, adinez
zahartzea…), bere izaerari eta auzo-bizitzari eutsi eta indartzeko premia
larria du eta horretarako, besteak beste, adin ezberdinetako auzotarrok elkartzeko, eztabaidatzeko, sortzeko eta
harremanak saretzeko ekipamenduak behar ditu.
Ez dugu erreferentziazko gune egonkorrik auzo-bizitza bideratzeko
ezta auzogintza, kulturgintza eta heziketa ez formal zein informaleko jarduerak
garatzeko ere. Gune horien bila egindako ibilbidea luzea da eta beti oztopo
berarekin egin dugu topo, erantzun bera eman digute behin eta berriz: Alde
Zaharrak ez duela honelako eskaintza berma dezakeen eraikinik. (…)
Eta egunez egun auzoak bizi duen
egoerak okerrera egiten segitzen duela uste dugu. Etxebizitzen prezioek gora
eta gora jarraitzen dute, turismoari eskainitako eraikin osoak ugaritzen ari
dira, betiko denda eta taberna ugari itxi beharrean, negozio
pribatuak irentsitako espazio publikoa gero eta handiagoa, eraikin publikoetan
ez dago sekula auzo erabilerarako tokirik (Bretxa, San Telmo, Moilako
Portaviones eraikina, Santa Teresa…). Gentrifikazioaren gaitzak jota dago
auzoa.
Auzoak
Kijera Gaztetxea eta Kaialde eraikina behar ditu
Egoera honen erdian, Kijera
Gaztetxea, bere neurrian, auzoak ekipamenduetan dituen gabezia kronikoei
erantzuten aritu da azken bi urteotan.
2018ko
irailaz geroztik, Kijera Gaztetxearen inguruan sortutako ekimenak eta dinamikak
auzotarron zenbait premia (gazteonak, bereziki) asetzen ari ziren eta Alkatea
zesioaz hitz egiteko prest agertu zenetik elkarrizketa bideari ekin genion.
Horretarako, auzoko hainbat eragilez osatutako mahaia izan da udalarekin
elkartu eta akordioa lantzeaz arduratu dena.
Azken
hilabeteotan auzoko lan mahaiaren eta udal ordezkarien artean sortutako
elkarrizketa prozesuan emandako pausoak kontuan hartuta, zesio-akordiorako
baldintzetan adostasunera ailegatzen ari ginela ematen zuen, ekimen eta
dinamika horiek kontsolidatzeko aukera irekitzen ari zela baitzirudien.
Bide malkartsua zirudiena, beraz,
leuntzen ari zela ematen zuen 2019ko uda hasieran eta akordio duin baterako
baldintzak izan zitezkeela pentsatzen hasi ginen auzoko eragileok; egia esan,
zesio akordioaren zirriborro baten inguruan adostasuna lortua genuela zirudien.
Udal
Gobernuak hitza jan du. Elkarrizketa eta lankidetza zapuztu
Auzotarron
batzarraren ordezkariok bilera eskatu genion Udal Gobernuari Kijera Gaztetxean
sortu berria zen arazo baten berri eman eta irtenbide egokiena elkarren artean
bilatzeko. Bilera abenduaren 23an egin genuen, alkatetzako bi ordezkari eta lan
mahaiaren zenbait kide elkartu ginen.
Bileran,
egoeraren berri eman genien udal ordezkariei eta arazoaren ebazpena udalaren
esku uztea egokiena zela ikusi genuen. Udalaren esku hartzea errazteko Kijera
Gaztetxearen giltzak utzi genizkien udal ordezkariei eta haiek baieztatu eta
berretsi zuten arazoa konpondutakoan giltzak bueltatuko zizkigutela. Gainera,
Kijera Gaztetxeko kideak haien ohiko dinamikei berrekin ahal izango zietela eta
Kaialde eraikinaren zesioa aztertzeko prozesuarekin aurrera jarraituko genuela
ziurtatu ziguten agendan aurreikusita genuen urtarrilaren 14ko bileran, hain
zuzen.
Urtarrilaren
14ko bileran, Gabinete Buruak adierazi zigun udalaren jarrera erabat aldatu
zela eta ordurarte adostear zegoen eraikinaren zesioa bertan behera geratzen
zela. Kaialde eraikinak egitura arazo larriak zituela adierazi zigun eta arazo
horiek ezinezko egiten zutela Kijera Gaztetxeak bertan jarraitzea eta
bukatutzat ematen zuela azken hilabeteetan lantzen aritu ginen
zesio-akordioaren bidea. Halaber, esan ziguten arazo tekniko horiek zeintzuk
ziren zehaztasunez azalduko zizkigutela otsailean egingo genuen bilera batean
(udal teknikariak behin betiko txostena amaitutakoan) eta aipatutako txostena
otsaileko bilera horretan erakutsiko zigutela.
Udalaren
erabaki horrek eta bozeramaleak erakutsitako jarrerak proiektu horren inguruan
piztutako espektatibak zapuztu egin ditu. Izan ere, bat-batean, udal
ordezkariek (Gaztetxea hutsik zegoela eta giltzak eskuan zituela
aprobetxatuta) urratutako bideak itxi,
itxaropenak zapuztu eta lankidetza-dinamika deuseztatu dituzte.
Kolpe
bakarrean auzoa ezer gabe utzi dute eta, zoritxarrez, aurreikuspenik ezkorrenak
bete dira, egindako bidea pikutara bidaliz.
Alkatetzak
ez gaitu agindutako otsaileko bilerara deitu
Otsailak 29
ditu gaur, hileko azken eguna da, eta alkatetzak ez gaitu agindutako bilerara
deitu. Hitza jan dute, berriz ere. Agindutakoaren kontra giltzak itzuli ez
zizkigutenean bezalaxe.
Egoera larria
da. Kijera Gaztetxea eta Kaialde eraikina galduta auzo bizitzarako tokirik gabe
gelditzen da Parte Zaharra.
Aipatutako
arrazoiak hitz hutsak dira, ez digute txosten teknikorik erakutsi
Giltzak ez
itzultzeko eta zesio-bidea ixteko ustezko arrazoiak teknikoak omen dira.
Txosten tekniko batek hori erakusten omen du, baina urtarrileko bileran ez
ziguten behin-behineko txostena erakutsi nahi izan, eta behin betikoa
erakusteko eta eraikinaren arazoak zehaztasunez azaltzeko agindu ziguten bilera
ez dute deitu. Ez deitu, ez besterik esan ere.
Sinestu behar al diegu?
Udalari dei egiten diogu
Honenbestez,
dei egiten diogu Udal Gobernuari okertutako bidea zuzendu eta abenduaren 23ko
bileran hitz emandakoa bete dezan, Kijera berriz ere irekitzeko aukera eman eta
lehenbailehen adostear genuen zesio-akordioa sina dezan.
Donostia, 2020ko otsailaren 29a
|
Parte
Zaharreko eragile hauek (15) :
●
Parte Zaharrean Bizi auzo elkartea
●
Guardetxea
●
Herria Elkartea
●
Kresala Kultur Elkartea,
●
Orixe Ikastolako Guraso Elkartea
●
Haurguneko Gurasoak
●
Kijera Gaztetxea
●
Alde Zaharreko Gazte Asanblada
●
Kale Lagunak Kirol Taldea
●
Hotel + Ez
●
Haraino astialdi taldea
●
Arrano Beltza Euskaltokia
●
Kai Harripe elkartea
●
Euskal Jaien Batzordea
|
|
