Donostiako Udalak "tokiko merkataritzari
laguntzeko kanpaina" bat jarri du abian, erosketa-bonuen sistema baten
bidez. Bonu horiek "online" bidez erosiko dira, kanpainari atxiki zaizkion
Donostiako saltokietan trukatzeko (ikus laukia).
Gure auzo elkartea, Parte Zaharrean Bizi, aspaldidanik
ari da salatzen gure auzoa turismo- eta ostalaritza-konplexu handi bat bihurtu
dela, eta bizilagunok gure eguneroko erosketak egiten genituen ohiko tokiko
merkataritza tradizionala tabernek, jatetxeek, hotelek eta souvenir dendek
ordezkatu dutela.
Badakigu, alarma-egoera baino lehen, Alde Zaharreko
tokiko merkataritzak eta hurbileko merkataritzak zailtasunak izan bazituztela:
Internet bidezko erosketak, alokairu handiko lokalak, erretiroagatiko jarduera-segidarik
eza, Udalak orain arte merkataritza-mota horri laguntzarik ez ematea
(ostalaritza eta azalera handiak sustatuz). Kontua da, arrazoi batzuk edo beste
batzuk direla medio, azken urteotan ikusi dugula, ezinbestean, nola itxi diren
saltoki asko eta nola ordeztu dituzten frankiziek, turismoari zuzendutako dendek
eta ostalaritzarako biltegiek.
Koronabirusa izan daiteke geratzen zaigun
tokiko merkataritza urriari akabera emango diona. Horregatik,
garrantzitsua iruditzen zaigu tokiko merkataritzaren susperraldia babestea,
bereziki larria den une honetan.
Baina ez dugu begi onez ikusten Udalak
laguntza horiek (zuritze hutsa iruditzen zaigu gehienez, 1.600€ko
laguntza ematea, hori ez baita krisia gainditzeko aski) tokiko merkataritzako
enpresei ez ezik, frankizia edo inbertsio-taldeetako turismo eta ostalaritzako
enpresei ere emango zaizkiela erabakitzea, nahiz bertakoak, nahiz nazioartekoak
izan. Merkataritza tradizionalari eusten laguntzea ez da bateragarria
hura ordezkatzen ari direnei ere laguntzearekin, ezin dira "tokiko
merkataritzaren" zaku berean sartu.
Hala eta guztiz ere, Parte
Zaharrean Bizi elkarteak kanpaina babestea erabaki du, beharrezkotzat jotzen
baitu tokiko merkataritza bultzatzea, eta bat dator Udalarekin "plataforma
global handien bidezko merkataritza elektronikoaren mehatxuaren aurrean, sektoreari
babesa ematea, …" garrantzitsutzat jotzen duenan. Guk beste mehatxu batzuk
ere gehituko genituzke, hala nola hiriko gobernuaren beraren erabakiekin
zuzenean lotuta dauden azalera handiak ugaritzeko eta/edo handitzeko baimena.
Ondorioz, auzotarrek datorren urteko
martxoaren 14a baino lehen erosketaren bat egiteko asmoa badute (kontsumitzeagatik
ez da kontsumitu behar, noski), bonuak erostera animatu nahi ditugu, eta bonu horiek
tokiko saltokiei benetan laguntzeko izan daitezela. Azken batean,
bonuekin, edo bonurik gabe, gure aukera tokiko merkataritzan erostea ezan
dadila.
Informazio gehiago, Udaletxeko web orrian: https://www.donostia.eus/home.nsf/0/9757DF78AFC8D351C1258574003B527B?OpenDocument&idioma=eus
Erosketa-sistema
www.donostiamarketplaza.eus web
orrian sartu eta zein establezimendutarako erosi nahi den aukeratu behar da. 20
€-ko balioa du, eta erosleak 14 € besterik ez du ordaintzen. Beste 6 euroak Donostiako
Sustapenak ordainduko dizkio establezimenduari. Gehienez, bost bonu eros
daitezke, dela establezimendu baterako, dela gehiagotarako, baina bonu bakoitza
erosi den establezimenduan soilik erabil daiteke.
Bonuak
maiatzaren 27tik abuztuaren 31ra bitartean erosi ahal izango dira (ala agortu
arte). Bonuak 2021eko martxoaren 14ra arte aldatu ahal izango dira.
No hay comentarios:
Publicar un comentario