2019/04/08

"Erraza da. Lehen hitza euskaraz" kanpainaren berri

Udalak duela hiru bat aste abian jarri zuen "Erraza da" ekimena. https://www.errazada.eus/ 

Ostalaritzan euskararen erabilera areagotzeko asmoa du:  bezeroen eta langileen arteko hizkuntza hautuak euskararen alde egin dezan sustatu nahi dute. http://www.donostiaeuskaraz.eus/merkatari/euskara-ikasi/sekzioak/erraza-da/lang/eu 

Parte Zaharreko  tabernetan garatzen ari dira ekimenaren lehen kanpaina, eta hurengoetan beste auzoetara zabaltzeko asmoa dute.

Kainpainaren xede zehatza hau da: "Ostalaritzan lan egiten duten pertsonak euskarara hurbiltzea eta bezeroek euskaraz eska dezaten ateak zabaltzea."


Horretarako hau proposazten diete langileei: "Egunean bi hitz ikasita, 3 hilabeteko epean, 200 hitz ulertzeko gai izan daitezen"



Hitz horiek ikas ditzaten hiztegi berezi bat banatu dute tabernako langileen artean. 




Ekimenean sartuta dauden tabernak identifikatzeko karteltxo hau prestatu dute. 
Gainera tabernako jabeek Hizkuntza paisaia- errotuluak euskaraz jartzeko diru-laguntzak:jasotzeko aukera badute 




Auzotarrok eragile aktibo izatea eta tabernetan euskaraz aritzea espero dute antolatzaileek 

2019/03/25

Parte Zaharrean Bizi elkartea eta Kaialde eraikinaren zesioa. Zenbait xehetasun.

 Parte Zaharrean Bizi elkartea eta Kaialde eraikinaren zesioa. Zenbait xehetasun.

Euskarazko testua ulertzeko zailtasunak badituzu itultzaile automatiko hauetako bat balia ditzakezu:

Puedes utilizar uno de estos traductores automáticos si tienes dificultades para entender el texto en euskera: 

Kaialde eraikina hamabi urtzez hutsik eman ditu. 2018ko irailaren hasieran auzoko Gazte Asanbladak eraikina okupatu eta bertan Gaztetxea martxan jartzeko proiektuari ekin zion. Horrez geroztik ekimen ugari garatu dira bertan, batzuk Gaztetxeko kideek sustatuta, auzoko bete eragileren bat sustatuta beste batzuk.

Kaialderen okupazioaren harira irailean idazki bat argitaratu genuen, non…

·     Auzoaren ekipamendu gabezia, beste behin, salatzen genuen

·     2014an Kaialde eraikinean Auzo Etxea eraikitzeko proiektu zapuztua gogora ekartzen genuen

·     Udalari proposatzen genion lan mahai bat eratzea (auzoko eragileak eta udal ordezkariak bilduko zituena) auzoko ekipamendu beharrei behingoz irtenbidea bilatzeko; eta bitartean Gaztetxea eraikitzeko proiektuan ziharduten gazteekin hizketan has dadin


Abenduaren bukaeran Udalak ebazpen bat onartu zuen eraikina ‘berreskuratzeko’ espedienteari hasiera emateko eta eskatzeko Kaialde eraikinaren erabiltzaileei jarduerak egiteari utz ziezaiotela edozein jarduera. Honen aurrean auzo elkarteak:

  • Udalari eta Hezkuntza Sailari idazki bat bidali zien non auzoak dituen ekipamenduen beharra azpimarratzen genituen ets eskatzen genien: “‘berreskuratzeko’ prozesua etetea eta eraikinaren erabilera-eskubidea auzoko eragileen esku uztea”


Egoera honen aurrean Parte Zaharrean Bizi auzo elkarteak honako hauek adierazi nahi ditu:

o   Zerbitzu publikorako eraikinak horretarako erabili behar dira. Eta Kaialde eraikina heziketa-, aisialdi- eta kultura-jardueretarako propio sortutakoa izanda, halako jardueretarako erabili behar da.

o   Agintari publikoen ardura da ondare publikoa zaintzea eta zerbitzu publikorako diren eraikinak horretarako erabiltzea, bai eta herritarren beharrei erantzutea, herritarren hitza entzutea eta haien ekimenak babestea ere.

o   Utzikeria da zerbitzu publikorako eraikin bat 12 urtez hutsik egotea eta hondatzen uztea.

o   Arduragabekeria da eraikin hori abandonatuta uztea, erreferentziazko lokal egonkorrik ez izateagatik auzotarron behar asko asetu gabe dauden bitartean.

o   Parte Zaharrak badu eraikin hori  ‘berreskuratzeko’ beharra; berez izan beharko lukeen erabilerarako berreskuratu, hain zuzen: heziketa-ez formala eta informala, aisialdia, kultura…

o   Erreferentziazko gure iraunkorra behar dugu auzoa biziberritzeko: auzo-bizitza sendotzeko, auzotarron elkarbizitza eta kohesioa indartzeko, auzogintza- eta kulturgintza-jarduerak garatzeko…

Eta oraingo korapiloari askabide eraikitzailea emateko eta Ikusirik oraindik ez dela definitu eraikin horren erabilera publikorako proiektu zehatzik, honako hau proposatzen diogu Udal Gobernuari:

o   Orixe Ikastolaren egoitza izan zen Kaialde eraikin hori ‘berreskuratzeko’ espedientea eta ekimenak bertan behera utz ditzan.

o   Kaialde eraikinaren erabilera-eskubidea auzoko eragileen esku laga dezan, bertan heziketa ez formala zein informaleko eta auzogintza eta kulturgintzako jarduerak garatzen jarraitzeko.

  • Parte Zaharrean auzogintzan, kulturgintzan, astialdian eta heziketa informal zein ez formalean diharduten beste zenbait eragilerekin  harremanetan jarri ginen auzoko ekipamenduez batera lan egiteko eta aipatu lan mahaiaren oinarriak jartzen joateko.

Urtarrilaren amaieran Alkatetzak bilera bat proposatu zigun gaiaz hitz egiteko. Bileran ekipamenduen gabeziek epe-ertain luzeko irtenbideez hitz egiteaz gain, Kaialde auzoko eragileen esku uztea eskatu genuen. Alkateak Kaialderen kudeaketa (behin-behin, adinekoentzako apartamentuen obrak hasi bitartean eta ‘cesion en precario’ formula baliatuz) auzo elkartearen esku uzteko aukeraz hitz egiteko prest zeudela adierazi zigun. 
Guk azaldu genion, hartzekotan, hartzailea ez zela izango auzo elkartea bera, auzoko eragileak elkarlanean baizik.  Hilabeteko epea eman genion elkarri ideia lantzen joateko.


Otsailean eta martxoan zehar elkarlanean aritu gara auzoko eragileak. Zesioaren inguruko irizpideak lantzeaz eta partekatzeaz gain, Auzoa Berreskuratu Eguna ekimena jarri dugu abian, otsailaren 23ko saio izan zen ekimen horren lehen emaitza eta laster izango dira berriak.

Bileratik hona harremanetan izan gara alkatetzarekin: eragileok idatziz helarazi dizkiogu udalari gure irizpideak, entzun ditugu udalaren proposamenaren nondik norako nagusiak. 

Orain proposamen zehatz eta artikulatu baten zain gaude, hitz egiten jarraitzeko eta auzoarentzat onuragarri izango den adostasun batera iristeko.

Prentsara ailegatu da zesioaren proposamenaren berri. Eta hobetsi dugu erantzuna auzo elkartearen izenean baino eragile guztion izenean ematea. Hau da auzoko eragileok egin dugun adierazpena: http://partezaharreanbizi.blogspot.com/2019/03/parte-zaharreko-eragileon-prentsa.html

Zenbait hedabidek jaso dute jada gure adierazpenaren berri.


Esan bezala, Alkatetzak agindu digun zesio akordio zehatzaren zain gaude hurrengo urratsak emateko. Jasotakoan eragileon aztertu eta erantzun bateratua emango dugu. Izango duzue horren berri. Espero dezagun laster izatea eta baikorra.

2019/03/22

Parte Zaharreko eragileon prentsa-oharra Kaialde eraikinaren zesioaz

(jarraian gaztelaniaz, en castellano a continuación)


Parte Zaharreko zenbait eragileren adierazpena, Kaialde eraikinaren zesioa dela-eta


Azken egunotan prentsan Kaialde eraikinaren zesioari buruz agertutakoaren harira, Parte Zaharrean auzogintzan, kulturgintzan eta astialdian dihardugun hainbat eragilek adierazi nahi dugu: aipatu zesioa aukera egokia izan daitekeela iruditzen zaigu auzoak dituen auzo bizitzarako ekipamenduen behar eta gabeziak konpontzen joateko, eta bertan garatu diren auzotarrontzako jarduera eta auzogintza dinamikak bideratzeko, eta berriak sortzeko, egoera normalizatu batean.

​Auzoko eragileok prest gaude Kaialde eraikina --gure arteko elkarlanean eta lankidetzan-- zesioan hartzeko aukeran sakontzeko, eta horrela adierazi diogu alkatetzari. Harremanetan gaude alkatetzarekin: adierazi diogu gure iritzia eta entzun ditugu haien proposamenaren nondik norako nagusiak. Orain proposamen zehatz eta artikulatu baten zain gaude, hitz egiten jarraitzeko eta auzoarentzat onuragarri izango den adostasun batera iristeko.

Izan ere, duela bi hilabete Parte Zaharrean auzogintzan, kulturgintzan eta astialdian dihardugun hainbat eragilek, gure auzoak bizi duen bilakaera eta ekipamendu falta orokorra dela-eta kezkaturik, egoera horren azterketa egin eta soluzioak bilatu eta jorratzeko helburuarekin  lan-mahaia osatu genuen.

Otsailaren 23an “Auzoa Berreskuratu Eguna” antolatu genuen eta,  auzoaren inguruko beste zenbait kezkekin batera, Kaialde eraikinaren inguruan landutakoa helarazi genion iritzi publikoari. Bertan genionez:
Parte Zaharrak, pairatzen ari den bilakaera dela-eta (turistifikazio masiboaren ondorioak, auzotarren alde egitea eta biztanleen galera, adinez zahartzea…), bere izaerari eta auzo-bizitzari eutsi eta indartzeko premia larria du eta horretarako, besteak beste, adin ezberdinetako auzotarrok  elkartzeko, eztabaidatzeko, sortzeko eta harremanak saretzeko ekipamenduak behar ditu.
Ez dugu erreferentziazko gune egonkorrik auzo-bizitza bideratzeko ezta auzogintza, kulturgintza eta heziketa ez formal zein informaleko jarduerak garatzeko ere. Gune horien bila egindako ibilbidea luzea da eta beti oztopo berarekin egin dugu topo, erantzun bera eman digute behin eta berriz: Alde Zaharrak ez duela honelako eskaintza berma dezakeen eraikinik. (…)
2018ko irailean, 12 urtez hutsik eta erabilpenik gabe egon den Kaialdeko eraikinean Alde Zaharreko Gazte Asanblada sartu eta txukunketa lanetan gogotik lan egin ondoren, auzoari ateak ireki eta bertan ekimen asko eramaten ari dira aurrera, hainbat eragile eta bizilagunen eskutik: hitzaldiak, hainbat eragileren bilerak, tailerrak (joskintza, xaboigintza, zirko, kick boxing, sukaldaritza…), filosofia-mintegia, bertso-eskola, poesia emanaldiak, zine-foruma, topaketak, arte sormeneko jarduerak, literatur lehiaketa; dantza, antzerki, pailazo, mago eta zirkuko saioak; haurgunea, haurrentzako tailerrak, liburu aurkezpenak, musika emanaldiak,   ...  Auzoaren bizitza saretzeko aukera izaten ari da bertan hainbat eragile, eta aipatu dugun hutsuneren parte bat betetzen ari da egunez egun.

Hori guztiagatik, hasieran esan bezala, auzoko eragileok prest gaude Kaialde eraikina zesioan hartzeko aukeran sakontzeko, harremanetan gaude alkatetzarekin gaia aztertzeko eta proposamen zehatz eta artikulatu baten zain gaude hitz egiten jarraitzeko eta auzoarentzat onuragarri izango den adostasun batera iristeko.

Donostia, 2018-03-21

·       Parte Zaharrean Bizi auzo elkartea.
·       Kijera Gaztetxea
·       Haurguneko gurasoak
·       Karmengo Jaien batzordea
·       Hotel + Ez!
·       Kale Lagunak kirol taldea
·       Orixe Ikastolako Guraso Elkartea
·       Haraino astialdi taldea
·       Kresala Kultur Elkartea




Declaración de entidades vecinales en la Parte Vieja sobre la cesión del edificio Kaialde


Entidades vecinales en la Parte Vieja que trabajamos en el ámbito de la acción vecinal, cultural, de ocio y tiempo libre, ante las noticias aparecidas en la prensa sobre la cesión del edificio Kaialde, queremos manifestar: la cesión puede ser una buena oportunidad para ir solucionando las necesidades y carencias que sufre el barrio de equipamientos para la vida vecinal, y para canalizar las actividades y dinámicas que allí se han venido desarrollando y desarrollar nuevas, en una situación normalizada.

Las entidades abajo citadas estamos dispuesta continuar analizando la posibilidad de asumir (en colaboración y trabajo compartido) la cesión de la gestión del edificio Kaialde, y así se lo hemos manifestado ayuntamiento. Estamos en contacto con alcaldía: le hemos comunicado nuestra opinión y hemos escuchado los rasgos fundamentales de su propuesta. Ahora estamos a la espera de una propuesta más concreta y articulada para continuar conversando y poder llegar así a un acuerdo que sea beneficioso para el barrio.

Hace ya dos meses que varias entidades de la Parte Vieja que trabajamos en el ámbito de la acción vecinal, cultural, de ocio y tiempo libre, preocupadas por la situación que vive nuestro barrio y por la falta de equipamientos para la vida comunitaria, formamos una mesa de trabajo para analizar la situación  e ir buscando y desarrollando soluciones.

El 23 de febrero organizamos ‘“Auzoa Berreskuratu Eguna” y manifestamos a la opinión pública nuestro interés por buscar una solución a esta falta de equipamientos y nuestra propuesta sobre el edificio Kaialde. Decíamos allí:
La Parte Vieja necesita acciones urgentes para mantener y fortalecer su esencia y vida vecinal, para rectificar la evolución que sufre (consecuencias de la turistificación masiva, perdida y envejecimiento de la población…). Entre otras, necesita equipamientos en los que vecinos y vecinas de diferentes edades puedan juntarse, debatir, crear y tejer redes relacionales.
El barrio carece de espacios estables y referenciales para desarrollar la vida y actividad vecinal, acciones y actividades culturales, actividades de educación formal e informal o de tiempo libre… Hemos recorrido un largo camino en busca de espacios para satisfacer esas necesidades, pero siempre nos hemos topado con el mismo obstáculo, siempre se nos ha dado la misma respuesta, esta: la Parte Vieja no tiene ningún edificio que pueda satisfacer esas necesidades. (…)
Tras estar 12 años vacío y en desuso, en septiembre de 2018, la Gazte Asanblada de la Parte Vieja entró en el edificio Kaialde y tras acondicionarlo lo abrió al barrio y desde entonces se realizan actividades de la mano de diferentes agentes, colectivos y vecinas y vecinos del barrio: conferencias, reuniones, talleres de costura, jabones, circo, kick boxing, astronomia, cocina, etc.; seminarios de filosofía, bertso-eskola, recitales de poesía, cine-forum, encuentros, actividades de creación artística, certámenes literarios, actuaciones de danza, teatro, payasos, magos y circo; un haurgune, talleres para niñas y niños; presentaciones de libros; recitales de música, etc. Está siendo un lugar donde muchos agentes trabajan para cohesionar la vida del barrio y de esta manera cubrir día a día parte de esa necesidad antes mencionada.
Por todo esto, Las entidades vecinales estamos dispuesta continuar analizando la posibilidad de asumir la gestión del edificio Kaialde, estamos en contacto con alcaldía para analizar la cuestión y estamos a la espera de una propuesta más concreta y articulada para continuar conversando y poder llegar así a un acuerdo beneficioso para el barrio.




2019/01/15

Haurguneko gurasoek Protesta Festa antolatu dute hilaren 16rako (asteazkena)

Kaialde eraikinean (Kijera Gaztetxean) Haurgunea martxan jartzen ari diren gurasoek Protesta Festa antolatu dute bihar arratsalderako, Udaletxearen parean. Haurgunearen beharra aldarrikatzeko.
Gurasoak eta haurrak ez ezik,  Auzolagun guztiak ere gonbidatu gaituzte Protesta Festan parte hartzera.

Bideo honetan aurkezten dute Haurgunea eta Protesta Festa:



 

Aurretik (joan zen ostiralean) Haurgunean egiten dutena azaltzeko eta hura antolatzeko prozesua kontatzeko adierazpen argia eta indartsua plazaratu zuten, hemen duzue:










2019/01/10

Alkateari erantzuna Kaialde eraikinari (Kijera gaztetxeari) buruz:

Hemen Parte Zaharrean Bizi auzo elkarteak Alkate jaunari bidali dion erantzuna:

=== === ===
Alkate jauna:


Gaurko prentsan irakurri ahal izan dugunez, atzoko prentsaurrekoan Kaialdeko eraikinaren okupazioaz eta gure auzoaren ekipamendu gabeziaz hitz egiterakoan honako hauek adierazi zenituen:
·     “Udala prest dago irtenbide bat lantzeko ikerketa bat eginez.”
·     Udala prest dago Parte Zaharrean Bizi elkartearekin elkartzeko eta “Beharren inguruan hitz egiteko... Seguru gaude eskatzen dutena eta eskaini ahal duguna ez dela gauza bera. Baina adostasunera iristeko prest gaude, baita hitz egiteko ere”.

Horren aurrean honako hauek adierazi nahi ditugu:
·     Geu ere prest gaude Udalarekin elkartu eta hitz egiteko; beti prest, gai honi buruz hitz egiteko eta auzoko beste arazoei buruz hitz egiteko.  Baina hitzetatik haratago joan behar du udal gobernuak, eta zenbait gairen inguruan (ekipamenduen falta besteak beste) irtenbidea gauzatzen hasi behar dira jada, konponbideak ezin dira gehiago atzeratu.
·     Ekipamenduen arazo kronikoari soluzioa bilatzeko Udalarekin elkartzeko prest gaude bai, baina arazo honen azterketan eta konponbideen definizioan auzoko eragile gehiagok ere parte hartu behar dutelakoan gaude. Horregatik berresten diogu irailaren 5ean egin genuen proposamenari: “Gauzak horrela, orain, Udal Gobernuari proposatzen diogu lan-mahai bat osatu dezan ahalik eta azkarren, non auzoko eragile eta udal teknikari eta arduradunak elkartuko garen auzotarron ekipamendu beharrei irtenbideak behingoz bilatzeko eta “Gaztetxea eraikitzeko proiektuan diharduten gazteengana hurbildu, haiekin elkartu eta hizketan has dadin”.
·     Eta arazoa aztertu eta konponbidea gauzatzen dugun bitartean, urtarrilaren 2an Udal Gobernuari eskatutakoari heltzen diogu orain ere:
  • Kaialdeko eraikina berreskuratzeko’ espedientea eta ekimenak bertan behera utzi ditzazuen.
  • Eraikin horren erabilera-eskubidea[1], auzoko eragileen esku laga dezazuen, bertan heziketa ez formala zein informaleko eta auzogintza eta kulturgintzako jarduerak garatzen jarraitzeko

Lan-mahai horren eraketa bilera laster deituko duzuelakoan gaude, geuk gure aldetik lan-mahaian parte hatzera animatuko ditugu auzoko beste zenbait eragile.

Ekin diezaiogun konponbidea definitzeari!



Donostia, 2019-01-09
Parte Zaharrean Bizi auzo elkartea




[1] Ikusirik ez dela definitu eraikin horren erabilera publikorako proiektu zehatzik.

=== === ===


Ekipamendu gabeziaz auzo elkartearekin hitz egiteko prest zegoela esateaz gain, asko saltzen den egunkari baten arabera Kaialde eraikinean adineko jendearentzako apartamentu egokituak egiteko ustezko proiektuaz hitz egin omen zuen alkatea. Egun hauetan zenbait kazetari eta tertulianok aipatu dute ustezko egitasmo hori.
Laster argitaratuko ditugu artikulu berri bat ustezko proiektu hori zertan den azaltzen



2019/01/02

PZB auzo-elkartearen adierazpena: Kaialde eraikinak aisialdi-, kultura- eta heziketa ez formaleko jardueretarako erreferentziazko gune egonkorra behar du izan


PZB auzo-elkartearen adierazpena, Parte Zaharreko auzotarrei eta Donostiako herritarrei zuzendua.
Berriz ere esango dugu:
Gure auzoan behar asko dira, auzo-bizitzarako ekipamenduak besteak beste.
Auzoko eraikin publikoak auzotarroi zerbitzu publikoak emateko erabili behar dira.
Kaialde eraikinak aisialdi-, kultura- eta heziketa ez formaleko jardueretarako erreferentziazko gune egonkorra behar du izan

( Si necesitas una traducción al castellano de este texto escrito en euskera puedes utilizar alguno de estos traductores automáticos:  https://modela.eus/eu/itzultzailea , http://www.itzultzailea.euskadi.eus/traductor/portalExterno/url.do o https://translate.google.es/?hl=eu&tab=TT  )

Gure auzoak ekipamenduak behar ditu, askotan esan dugu:
·        Ez dugu erreferentziazko gune egonkorrik auzo-bizitza bideratzeko eta auzogintza, kulturgintza eta heziketa ez formal zein informaleko jarduerak garatzeko. Auzoan eta inguruan badira, bai, kultur ekitaldiak eskaintzen dituzten antzokiak eta aretoak, baina ez auzotarrak elkartzeko eta elkarrekin ekin, egin eta egoteko gunerik. Auzo-bizitzak era guztietako espazioak behar ditu: bai kultur kontsumorako aretoak, baina baita sorkuntzarako guneak ere; bai hitzaldi-aretoak, baina baita gogoeta partekatu eta eztabaidatzeko tokiak ere; bai gune antolatu eta tutorizatuak, baina baita gune autogestionatuak ere…

Parte Zaharra degradazio-bidean sartzeko arriskuan da:
·        Azken urteotan nabarmen hondatu da auzotarron bizi-kalitatea, auzo-bizitza itotzeko arriskuan da. Biztanleria galtzen ari da; etxebizitza asko hotel, pentsio edo apartamentu turistiko bihurtu dira; espazio publikoak jarduera komertzialetarako erabiltzen dira; zenbait eraikin publiko enpresa pribatuen esku utzi dira negozio-jarduerak garatzeko; betiko komertzio- eta taberna-eredua desagertzen ari da eta gainustiapen turistikora bideratutako komertzioak eta tabernak nagusitzen ari dira.
·        Auzoa biziberritzeko neurri eraginkor eta urgenteak hartu behar dira, galbidean sar ez dadin, auzo bizia eta bizitzekoa izaten jarrai dezan, ez dadin bihurtu parke tematiko eta dekoratu apain. Berandu baino lehen jarri behar dira abian Parte Zaharrerako Plan Integralean aipatutako lan-ildoak gauzatzeko neurriak, jada, eraginkortasunez.
·        Auzo-bizitzarako eta auzogintzarako ekipamenduak eta espazioak izatea ezinbestekoa izango da auzoa biziberritzeko.

Auzoak bazituen eraikin publiko egokiak behar horiek asetzeko. Baina horietako batzuei bestelako erabilera eman zaie: negozio pribatuetara bideratu dira.
Bada eraikin bat berez eta legez halako beharretarako propio sortu zena, hau da, heziketa-, aisialdi- eta kultura-jardueretarako: Kaialde eraikinaz ari gara, Orixe Ikastolaren egoitza izan zenaz, gerora urte luzez itxita eta hondatzen utzi den horretaz.
·        Eraikin  horrek historia luzea du, hainbat jaberen esku izan da, eta beti heziketa-, aisia- eta kultura-jardueretarako erabili izan da. Bere erregistro-deskribapenak argi uzten du zein den bere egitekoa: Aisialdi eta kulturarako lokala da”.
·        Orixe Ikastola izan zen eraikina azken hamarkadetan baliatu zuena[1]. Orixe Ikastola bera izan zen eraikinaren azken-aurreko jabea. Auzoko ikastola hezkuntza-sare publikoan sartu zenean, eraikina Donostiako Udalaren jabetza izatera pasa zen[2]. Honela agertzen da definituta Donostiako Udalaren Ondasunen Inbentarioan: Jabari eta zerbitzu publikoko ondasuna, Hezkuntza Sailari atxikia, irakaskuntza zerbitzuetarako.
·        Duela 12 bat urte utzi zitzaion irakaskuntza-zerbitzua bertan emateari, Haur Hezkuntzako gelak Zuloagako eraikinera eraman zirenean. Eta Kaialdeko eraikina hutsik geratu zen, hondatzen, alferrik galtzen[3]. Berez eta legez izan beharko lukeen heziketa-, aisia- edo kultura-jardueretarako erabilera izan gabe. Auzoan behar handia dugunean!!!

Eta 12 urte luze horietan hor ibili gara auzotarrok behar horiek asetzeko erreferentziazko toki egonkorrik gabe. Saiakerak eta ahaleginak egin ditugu, baina ez dute fruitu egonkorrik izan:
·        Pertsona eta kolektibo ugari aritu gara jarduerak antolatzen eta antolatu nahian. Zailtasun handia izan da toki egokia lortzea. Urte horietan zehar nabarmen baino nabarmenago geratu zaigu erreferentziazko toki egonkorraren beharra.
·        Behin bitarteko irtenbide bat izan genuen, 2013-2105 bitartean, behar batzuetarako behinik behin. Bretxako Arraindegi eraikinean hiru lokal erabiltzeko aukera eman zitzaigun. Bertan Haur Txokoa, Gaztelekua eta bilera-gela izan genituen. Bizitasun handia izan zuen Haur Txokoak: gurasoek antolatuta eta autogestionatuta, dozenaka ume elkartzen ziren jolastera negu gorriko arratsaldeetan. Baina esan bezala, ez zuen luze iraun, 2015ean utzi behar izan genituen jarduera horiek Bretxako Arraindegi eraikina birmoldatzeko obrak hastear zirelako (2018aren amaiera arte hasi ez badira ere).
·        2014an itxaropena piztu zitzaigun, bai baitzirudien Hezkuntza Saila eta Donostiako Udala akordioa egitekotan zirela, eta akordio horri esker Orixe ikastolaren egoitza izandako eraikina udalak berreskuratu eta auzoko eragileen esku jarriko zuela, auzogintza, kulturgintza eta heziketa ez formaleko jarduerak garatu ahal izateko. Auzo-etxea amesteari eta definitzeari ekin genion auzoko eragile eta auzotar askok. Baina ilusioak gutxi iraun zuen, Udal Batzan garai hartan oposizioan ziren-taldeek (EAJ, PSE eta PP) horren kontra egin baitzuten[4]. Gure poza putzura joan zen.
·        2018ko irailean zenbait auzotar Kaialde eraikinean sartu, gelak txukundu eta jarduerak antolatzen eta auzo-bizitzarako txokoak eskaintzen hasi ziren. Bertan hitzaldiak eta bilerak egin dira, mintegiak eta tailer iraunkorrak antolatu dira, haur txikien gurasoek haur-gunea autogestionatua sortu dute…

Orain, Kaialdeko eraikina erabiltzen ari direnei Udalak idazki bat helarazi die.  Jarduerak egiteari utz diezaiotela eskatzen die, eta eraikina berreskuratzeko espedienteari hasiera eman zaiola jakinarazi.

Egoera honen aurrean Parte Zaharrean Bizi auzo elkarteak honako hauek adierazi nahi ditu:
·        Zerbitzu publikorako eraikinak horretarako erabili behar dira. Eta Kaialde eraikina heziketa-, aisialdi- eta kultura-jardueretarako propio sortutakoa izanda, halako jardueretarako erabili behar da.
·        Agintari publikoen ardura da ondare publikoa zaintzea eta zerbitzu publikorako diren eraikinak horretarako erabiltzea, bai eta herritarren beharrei erantzutea, herritarren hitza entzutea eta haien ekimenak babestea ere.
·        Utzikeria da zerbitzu publikorako eraikin bat 12 urtez hutsik egotea eta hondatzen uztea.
·        Arduragabekeria da eraikin hori abandonatuta uztea, erreferentziazko lokal egonkorrik ez izateagatik auzotarron behar asko asetu gabe dauden bitartean.
·        Parte Zaharrak badu eraikin hori  ‘berreskuratzeko’ beharra; berez izan beharko lukeen erabilerarako berreskuratu, hain zuzen: heziketa-ez formala eta informala, aisialdia, kultura…
·        Erreferentziazko gure iraunkorra behar dugu auzoa biziberritzeko: auzo-bizitza sendotzeko, auzotarron elkarbizitza eta kohesioa indartzeko, auzogintza- eta kulturgintza-jarduerak garatzeko…

Eta oraingo korapiloari askabide eraikitzailea emateko eta Ikusirik oraindik ez dela definitu eraikin horren erabilera publikorako proiektu zehatzik, honako hau proposatzen diogu Udal Gobernuari:
·        Orixe Ikastolaren egoitza izan zen Kaialde eraikin hori ‘berreskuratzeko’ espedientea eta ekimenak bertan behera utz ditzan.
·        Kaialde eraikinaren erabilera-eskubidea auzoko eragileen esku laga dezan, bertan heziketa ez formala zein informaleko eta auzogintza eta kulturgintzako jarduerak garatzen jarraitzeko.


Donostia, 2019-01-02
Parte Zaharrean Bizi auzo elkartea



[1] Haur Hezkuntzako gelak Kaialde eraikinean ziren; Lehen Hezkuntzakoak, berriz, Urgullen.
[2] Une horretan Udalak Eusko Jaurlaritzaren Hezkuntza Sailari laga zion erabilera-eskubidea hezkuntza-zerbitzua ematen jarraitzeko.
[3] Eraikin horri bestelako erabilera emango zaiola noizbait aipatu bada ere (hezkuntza jarduerak, adinekoentzako apartamentuak…) hitzetatik haratago ez da joan, orain arte ez da inoiz definitu eraikin horren erabilera publikorako proiektu zehatzik.
[4] Eraikina hezkuntzako zerbitzuak (Hastapeneko Lanbide Heziketa, Irale…) emateko behar zela argudiatuz. Behar omen ziren hezkuntza zerbitzu horietaz ez da berriz ere hitz egin.