PARTE ZAHARREKO “SOTOEN” INSPEKZIOA ETA MAPA BAT BURUTZEA

Parte Zaharrean, duela urte batzuk, sute gehienak etxeetan ematen ziren. Horrek suertatzen zituen arriskuak ekiditeko, Administrazioak hainbat arau jarri zituen martxan. Ondorioz, etxeetan ematen ziren suteak gutxitu edo ia desagertu direnean, beheko lokaletan hasi dira ugaritzen.

Parte Zaharreko bizilagunok ez dakigu zer dugun etxe azpian, ez digute inongo notifikaziorik egiten etxe azpian jarri behar duten horretaz. Gehienez, obra bukatu ondoren ematen digute informazioa; bestelakoan, zurrumurruen bidez heltzen zaiguna jakin ohi dugu. 

Obrak burutzen ari diren bitartean, ez dugu ikusten udaleko teknikaririk inspekzioak egitera etortzen denik. Aldiz, istripu bat, edo bizilagunek salatzen dutenean edo sute bat suertatu izan denean, irregulartasun asko azaldu izan dira. Adibidez: obretako burdin bat eskaiolarekin estalia benetako zutabe bat balitz bezala jarrita, etxe azpietan egin diren komunikazio edo espazio bateratzeak, mirarizko taberna berriak, patio komunitarioak okupatzen dira, lizentzi gabeko obrak, lizentzi emate behin-betiko obrak ez datozenean bat Udalan aurkeztutako proiekturekin, eta abar luze bat...

Bizi-lagunoi etxeetara nahiz merkatariei beren lantokietara inspekzioak egitera etortzen zaizkigu, eta, zerbait ez badago ondo, epe bat ematen digute zuzentzeko. Epe hori amaitu ondoren, zuzendu ez badugu eten egiten digute gasa, argi indarra edo dena delakoa.

Baina, nork kontrolatzen ditu, etxe azpian burutzen diren obra horiek? Baimena Udalak ematen du, baina izaten ari garen esperientzian oinarrituta zalantza asko ditugu jaso duten baimena eta benetan burutzen diren obrak eta aktibitatea bat ote datozen.

Parte Zaharreko eraikuntza kontuan hartzen da, obren betebehar eta aktibitateen baimena esleitzerakoan?

Jokabide honen atzean zer dago, utzikeria edo beste zer edo zer larriagoa? 

Ez dira galdera soilak, “prebarikazioren” susmoa gero eta gehiago zabaltzen ari da eta susmoei aurre egiteko sendabide hoberena gardentasuna eta informazioa da.

Azkeneko horietako adibidea Txondorra tabernarekin daukagu. Baina aipatu daitezke gehiago: Atari, Sirimiri, Elurra, Bretxa erretegia, Ttun-Ttun, Enbeltrango sagardotegia, Ezpala, Konsti, 3an (lehen Lagun liburudenda zena), …

Honengatik, Parte Zaharrean Bizi Auzo Elkarteak eskatzen du:

Parte Zaharrean dauden “soto” edo “azpi lokal” guztien inspekzioa eta hauetan burutzen diren aktibitateen mapa bat burutzea. Obra berriei baimena emateko baldintzei hau gehitzea: bizilagunei jakinarazi zaiela adierazten duen dokumentua edo idatzia.